جلسة طلاق حكايات اسما السيد 2

فضلت باصة لاسم محمود النجار على الشاشة.

كريم كان أول واحد يتكلم.

— يمكن تشابه أسماء.

قلت:

— رقم الحساب مطابق للملف القديم.

سكت.

كنت فاكرة محمود كويس.

راجل هادي، محترم، أبويا كان بيثق فيه ثقة عمياء.

كان بيقعد معانا على السفرة.

وكان بييجي البيت في الأعياد.

بعد وفاة بابا، هو اللي ساعد كريم يقفل ملفات كتير.

أو على الأقل…

ده اللي كنا فاكرينه.

قلت:

— عايزة كل تعاملات محمود آخر عشر سنين.

كريم ضغط زر الاتصال الداخلي.

— هطلب من المراجعة—

مسكت إيده.

— لأ.

— ليه؟

— لو محمود لسه ليه عين جوه الشركة، أول ما نطلب ملفاته هيعرف.

كريم فهم.

— نشتغل من الأرشيف القديم.

قلت:

— بالظبط.

في المساء، رجعت البيت.

كان عمر لسه ماخدش كل حاجته.

لقيته واقف في الصالة، بيجمع بعض الملفات الشخصية.