ست سنوات حكايات اسما السيد 2
حسام جنبي قفل عينه.
التسجيل كمل.
داليا:
— حسام مانسيش يا ماما.
صمت.
وبعدين صوت نوال:
— حسام كان لازم يتربى.
داليا صرخت:
— إنتِ كنتِ بتقفليه في المخزن بالساعات!
نوال ردت:
— علشان كان عنيد.
— وكنتِ بتحرميه من الأكل!
— علشان كان بياكل من ورايا.
— وموضوع الكيس؟
الصمت طال.
وبعدين صوت نوال:
— ما ماتش يعني.
حسام مد إيده وقفل التسجيل.
كان نفسه سريع.
قلت:
— لأ.
مسكت الموبايل.
— لسه مخلصش.
قال:
— مريم كفاية.
— لأ.
شغلت التسجيل تاني.
صوت داليا رجع:
— وإنتِ فاكرة اللي حصل ليوسف كمان عادي؟
نوال صرخت فجأة:
— ماتجيبيش اسم يوسف!
بصيت لحسام.
هو نفسه فتح عينه بصدمة.
قلت:
— مين يوسف؟
قال:
— ابن خالتي.
التسجيل كمل.
داليا:
— يوسف كان عنده أربع سنين يا ماما!
صوت نوال:
— وأنا ماعملتش فيه حاجة.
— أمال ليه أهله منعوه ييجي بيتنا بعدها؟
نوال قالت:
— علشان أمه مجنونة.
داليا:
— لأ. علشان رجع البيت وقال إنك قفلتي عليه في المخزن.
وبعدين…
جت الجملة اللي خلتنا إحنا الاتنين نبص لبعض.
