زوجة زوجي حكايات اسما السيد 1
— مدام ليلى مش عندها “شوية أسهم”.
سكت لحظة.
— مدام ليلى تملك، بصورة مباشرة وغير مباشرة، 78% من المجموعة القابضة.
كريم خطف الورقة من إيده.
عينيه جريت على السطور بسرعة.
— مستحيل.
قلب الصفحة.
وبعدين اللي بعدها.
وشه بدأ يشحب أكتر مع كل ورقة.
— مستحيل… مستحيل…
دولت قربت منه.
— كريم، فهمني! يعني إيه الكلام ده؟
كريم ما ردش.
ليلى هي اللي ردت.
— يعني الفيلا اللي حضرتك واقفة فيها دلوقتي مش ملك كريم.
دولت بصت لها بصدمة.
— نعم؟!
— مسجلة باسم شركة عقارية تابعة للصندوق.
وبصت ناحية النجفة الكبيرة.
— والعربية اللي كريم بيركبها ملك الشركة.
وبعدين ناحية سما.
— والعربية اللي اشتراها لسما من شهرين… برضه ملك الشركة.
سما صرخت:
— دي عربيتي! كريم جابهالي هدية!
ليلى قالت بمنتهى الهدوء:
— من فلوس الشركة.
حسام أضاف:
— وده واحد من البنود اللي هتدخل في المراجعة المالية.
كريم رفع عينه فجأة.
— مراجعة إيه؟
حسام بص له مباشرة.
— كل مصروف خرج من حسابات المجموعة في آخر خمس سنين.
