تنتهـي الحرب وتبدأ هي بقلم اسما السيد 1

ظابط جيش رافض تماما الزواج لسبب لا يعلمه أحد إلا هو ..وهي طليقة اخوه اللي طلقها وسط العيله كلها علشان الخلفه ومهتمش بكونها يتيمه من غير أهل.. بتتقابل سكتهم مع بعض وبتبدأ بينهم حكايات احسن من اجدعها حـ رب..

جوزي يوم الجمعه في تجمع العيله قالي: بصي يا بنت الناس كل واحد من اخواتي عنده عزوه واولاد وانا مش اقل منهم .. الدكاتره قالت إن حملك صعب، وانا نفسي ابقي اب علشان كده قررت اتجوز ناهد بنت خالتي… مطلقه وولاده وسبق ليها الخلف . وانتي ليكي مطلق الحريه عاوزه تفضلي اهلا وسهلا وعلى راسي … عاوزه نفضها نفضها دلوقتي… دموعي نزلت غصب عني..وكله بيبصلي ويتغامز واللي بيضحك ومرتاح من قلبه.. ودي كانت طبعا خالته وبنت خالته اللي عليها القصد.. مسحت دموعي وبصيت لوالدته اللي طول سنين جوازي شغاله خدامه بدون أجره ليها .. استنجد بيها يمكن ترأف بحالي وتنوجع لوجعي.. لقيتها بتبتسم وتقولي : بصي يا بنت الناس يعلم ربنا انك اعز من بنتي بس يا حبيبتي هو الراجل لما يتجوز ويخلف هيتقبالك فيه ايه علشان تفضلي في بيتنا..الراجل بيميل لامي عياله يابنتي..!