زوجة زوجي حكايات اسما السيد 2
وسكت لحظة.
— وعلى ابنك كمان.
ليلى ما اتحركتش.
لكن كريم صرخ:
— كفاية كدب!
المحاسب لف ناحيته.
— أقولها على التقرير الطبي المزور يا كريم؟
الصالة كلها سكتت.
ليلى رفعت عينيها ببطء.
— تقرير…
— إيه؟
ليلى فضلت باصة لطارق.
وهو واقف مكانه…
وشه مصفر.
والكوباية المكسورة عند رجليه.
قالت بصوت متقطع:
— أنا مش فاهمة.
بصت للدكتور شريف.
— إنت بتقول إن العينة اللي اتعمل عليها تحليل النسب كانت بتاعة طارق؟
— أيوه.
— وأنا مالي بطارق؟!
طارق رفع إيده بسرعة.
— وأنا مالي بالموضوع أصلًا؟! والله ما أعرف حاجة!
كريم ضحك بسخرية.
— أهو بدأنا.
طارق لف له.
— بدأت إيه يا حيوان؟!
— ماتعملش فيها بريء.
— بريء من إيه؟!
كريم أشار ناحية ليلى.
— من اللي بينك وبينها.
طارق اندفع ناحيته.
— إنت اتجننت؟!
الرجلين اللي مع حسام وقفوا بينهم.
ليلى صرخت:
— كفاية!
الكل سكت.
حطت إيدها على بطنها.
كانت حاسة بابنها بيتحرك بعنف من التوتر.
أخدت نفس.
وبصت للدكتور.
— من الأول.
— وبهدوء.
— عايزة أفهم حصل إيه بالظبط.
