بنتي الصغيره حكايات اسما السيد 1
— قالتلي إن علاقتها بجوزك حصلت من حوالي 17 سنة.
غمضت عيني.
أنا وجوزي وقتها كنا متجوزين بقالنا سنتين.
وبنتي كانت لسه رضيعة.
كملت البنت:
— ماما اكتشفت إنها حامل… وقالت له.
— وهو عمل إيه؟
ضحكت ضحكة مرة.
— طلب منها تختفي من حياته.
حسيت حاجة باردة بتجري في ضهري.
— وبعدين؟
— لما ولدتني، عملت تحليل من غير ما يعرف في الأول. ولما النتيجة طلعت… واجهته.
بلعت ريقي.
— وبعدها؟
— دفع لها فلوس.
قمت من على الكرسي فجأة.
— جوزي دفع لأمك فلوس؟
— كل شهر تقريبًا لسنين.
قالت بسرعة:
— بس ماما بتقول إنها ما طلبتش منه يسكتها. هو اللي عرض. وفي المقابل… ما تقولش لحد مين أبويا.
كنت خلاص مش قادرة آخد نفسي.
لكن السؤال الأهم خرج مني:
— طيب… إيه علاقة ده بالحفلة؟ وليه فجأة بطلتِ تكلمي بنتي؟
سكتت البنت وقت طويل.
وبعدين قالت جملة كسرتني أكتر من كل اللي فات:
— لأني فضلت 11 سنة أعتبرها أعز صاحبة ليا… وبعدها في يوم واحد عرفت إنها أختي.
حطيت إيدي على بوقي.
