امي حكايات اسما السيد

فتحها.

طلع منها صورة صغيرة، باهتة من كتر السنين.

مدهالي.

أخدتها.

كانت أمي.

أصغر بكتير.

يمكن في أوائل العشرينات.

شايلة طفل رضيع وبتبصله وهي بتضحك.

قلت:

— الطفل ده مين؟

منصور رد:

— أنا.

قلب الصورة.

على الضهر كان فيه كلام بخط أمي:

“ابني… سامحني لو كبرت وفي قلبك سؤال أنا ماقدرتش أجاوبه.”

إيدي بدأت ترتعش.

قلت:

— احكي من الأول.

سند منصور ضهره على الحيطة.

وقال:

— أمك اتجوزت قبل أبوكي.

اتصدمت.

عمري ما سمعت الكلام ده.

قال:

— كانت صغيرة جدًا، والجواز ماكملش. وبعد ما خلفتني، حصلت مشاكل كبيرة، وأبويا أخدني وسافر بيا عند أهله.

قلت:

— وأمي سابتك؟

رفع عينه بسرعة:

— لأ.

صوته اتغير.

— دي أهم حاجة لازم تعرفيها… هي ما سابتنيش.

سكت لحظة وكمل:

— حاولت ترجعني أكتر من مرة. لكن وقتها ماكانش معاها سند ولا فلوس، وأهل أبويا رفضوا. وبعد سنين أبويا مات، وأنا اتربيت عند جدتي.

قلت:

— طب ليه ما رجعتش لأمي بعدها؟

ابتسم بحزن.

— لما عرفت أوصل لها، كانت اتجوزت أبوكي وخلفتك إنتِ وأختك.