عروسه البحر حكايات اسما السيد

البحر رجع هادي.
كأن مفيش حاجة حصلت أصلًا.
وقفت أتنفس بالعافية.
بصيت للطفل.
كان ساكت.
لكن إيده الصغيرة كانت ماسكة في هدومي بقوة.
قلتله:
— إنت جبتلي مصيبة يا ابني…
وكملت جري ناحية بيتي.
كنت عايش لوحدي في بيت صغير على طرف القرية بعد وفاة مراتي من سبع سنين.
دخلت وقفلت الباب ورايا بالمفتاح.
حطيت الطفل فوق السرير.
وقتها لأول مرة قدرت أبصله كويس.
كان شكله رضيع عنده يمكن ست أو سبع شهور.
وشه جميل جدًا…
وعينيه لونهم غريب بين الأخضر والرمادي.
والذيل الصغير كان مغطى بقشور فضية ناعمة.
قلت لنفسي:
— أنا هقول للناس إيه؟
“صباح الخير يا جماعة، لقيت طفل بنص سمكة في الشبكة”؟!
هيقولوا حسن اتجنن.
ولو صدقوني…
مين عارف هيعملوا فيه إيه؟
فضلت محتار.
وفجأة الطفل بدأ يعيط.
افتكرت إنه جعان.
جبتله شوية لبن كان عندي، وحاولت أقرب الكوباية من بقه…
رفض.
حاولت تاني…
بدأ يعيط أكتر.
قلت:
— طب أعملك إيه بس؟!
وفجأة عيني وقعت على جردل صغير فيه مية بحر كنت جايبه علشان الطُعم.



